改編歌詞 化身KOL
張美雄將The Beatles嘅經典名曲I Wanna Hold Your Hands，改編歌詞成I gonna wash my hands。張呼籲市民如果可以嘅話盡量少出街，佢攞住結他唱（Yeah, I've touched something.I think you'll understand.Now I'll need a scrubbing.I gonna wash my hands），提醒大家掂到污糟嘢後，就要洗手喇！最後佢仲連續講三次：「千祈千祈千祈，洗手洗手洗手！」睇嚟洗手真係好重要喎！
潮流興YouTuber，張話因為之前忙於選舉所以無暇拍片，依家的起心肝重新開始，一開始簡單唱吓歌先，佢之前仲改編翻唱過《野狼Disco》做《口罩Disco》添。
全港十八區區議會當中，泛民議員喺其中十七區佔多數議席，建制派同中間派變相成為少數派。身為中間派嘅西貢區議員張美雄就呻話喺區議會發言冇乜嘢用，又批評區議會變成「吹水會」之餘，民主派議員仲要討論好多冇乜實際用途嘅動議，變相「做騷」同「自High」，而佢就打算設立對話平台，直接同市民溝通啦！
上次西貢區議會開大會討論，將兩個分別喺調景嶺同將軍澳嘅休憩處命名為「周梓樂紀念公園」同「陳彥霖紀念公園」，最後動議暫停討論。張美雄話政府通常都係以臨近街道命名休憩處，就算動議得以通過，政府都大可以無視區議會嘅意見，畢竟區議會只係諮詢架構，冇實質權力，笑言成件事都係泛民議員「自High」，佢打算以後開會有必要先講嘢，冇乜必要都唔會搭嘴。
籌劃對話平台 邀學者參與
雖然喺區議會唔搭嘴，但佢就籌劃設立對話平台，話係個「飯盒會」，初步打算邀請學者定期出席，亦歡迎市民參加。佢話區議會同政府嘅關係愈嚟愈差，開始被政府邊緣化，區議會亦都比以往更加專制，少數派難以發聲，呻話不如直接落區了解市民嘅諗法仲好啦！
有關網址：https://orientaldaily.on.cc/cnt/news/20200322/mobile/odn-20200322-0322_00176_073.html
