依家疫情大爆發，搞到人心惶惶。話說張美雄幾日前喺社交平台貼文，話腸胃炎搞到發高燒，屙到腳軟，仲話會自我隔離抖吓添！咦！真係腸胃炎？佢話好彩醫生話佢冇任何上呼吸道症狀，所以暫時唔擔心中招，但佢話為求穩陣起見，都已交樣本去測試，而喺等結果期間，唔會見任何人。
終於日前檢測結果出咗，係呈陰性，即係冇事喇！佢都大呼好彩，事關喺呢段時間，好驚連累人。咁病好未呢？佢話雖則高燒已退，但仲屙緊喎。
相關網址：https://orientaldaily.on.cc/cnt/news/20200723/00176_085.html
西貢區議會日前舉行大會，區議員張美雄（Chris）提出動議，要求港鐵履行承諾，於二一年完成提升將軍澳線信號，並以全日都係七分鐘嘅間距，嚟加密康城往返北角嘅班次。雖然動議獲得通過，但係佢就鬧爆，話完全接受唔到港鐵要拖延至二六至二七年先至提升到將軍澳線信號系統，大嘆對區內市民好唔公平！
港鐵荃灣線新信號系統舊年三月測試期間發生事故，兩列列車喺中環站附近相撞，事故之後港鐵就以安全為由，將軍澳線提升工程要延遲五至六年。對比番其他線，將軍澳線似乎拖得特別耐，因為港島線只係延遲三至四年。
促康城站全日7分鐘一班
Chris話，將軍澳區依家愈嚟愈多人住，人口流動頻繁，但康城往返北角就得早晚繁忙時段係七分鐘一班車，居民成日都上唔到車，就算上到車都冇位坐，希望可以盡快做到全日七分鐘，疏導人流。否則政府同港鐵就應該停止將軍澳區住宅項目發展，以免增加區內人口，無論新舊居民都一樣受苦。
佢仲話，明白係安全至上，但都係睇港鐵願意投放幾多資源落去解決。嚟緊港鐵會落區議會，希望可以有個交代，以免全將軍澳嘅居民受苦啦！
有關網址：https://orientaldaily.on.cc/cnt/news/20200710/mobile/odn-20200710-0710_00176_084.html
