規管無人機操作嘅《小型無人機令》上個月1日起實施，新法例將無人機區分為3個類別，明確訂出各個類別嘅飛行高度同速度上限，以及最低橫向間距。本身都係航拍玩家嘅西貢區議員張美雄，指新例雖有助保障市民嘅安全同私隱，但就嫌某啲限制過於嚴苛，促請政府考慮放寬高度上限，同埋設立無人機公園或競技場，以免窒礙無人機嘅發展。
張美雄指出新例最令人詬病之處，係將只需註冊、免考牌嘅甲二類無人機嘅飛行高度上限定於90米，但對比外國類似嘅法例，限制嘅高度通常都係120米以上。佢話玩航拍，需避開地面嘅燈柱、電線杆或樹木，其實係飛得愈高愈安全，而90米嘅高度雖可越過好多障礙物，但同地面嘅距離始終有限，對航拍而言，好多風景都影唔到。
雖然，無執法者喺側邊「(目及)住」的話，飛行高度超過限制都無人知。不過張美雄話法例既已實施，就要守法喇。
不過佢又提出，政府不妨將一啲遠離民居嘅地方，劃為可放寬限制嘅無人機公園或競技場，咁就可以顧及市民嘅安全同私隱，又可以畀一眾無人機玩家盡展身手，係雙贏方案。
原文網址：政情：無人機新例 張美雄叫放寬高度限制 | 東方日報 | 要聞港聞 https://orientaldaily.on.cc/content/news/odn-20220711-0711_00176_403/
沒有留言:
發佈留言