【報章訪問】政情：張美雄確診無緣跨灣大橋開幕

 

今日正式啟用嘅將軍澳跨灣連接路，尋日所舉行嘅通車儀式可謂冠蓋雲集、賓客盈門；西貢區議員張美雄本來亦應該置身其中，然而相當不巧，佢喺通車大日子前夕染疫，無緣通車儀式。雖然佢話「要嚟嘅始終會嚟，今次到我中」，但居家養病期間，竟然見到自己成為網上討論區嘅嘲諷對象，真係百般無奈啊。

 

盼橋面設補給遭嘲笑

 

向來十分關注將軍澳交通基建嘅張美雄，前日開始唔舒服，已經冇返議辦，病徵主要係發燒、喉嚨痛、肌肉痠痛。由於同事每日快測都正常，所以議辦如常運作；可惜嘅係無法親身見證跨灣大橋同將藍隧道開幕禮，以及缺席呢幾日嘅新將藍巴士試車活動。另一方面，佢發現喺網上討論區，有網民嘲笑佢指「橋面1.8公里並無任何補給、洗手間或急救站，希望當局能加裝設備」嘅意見係多餘。

 

幸好，有明白事理嘅網民幫佢留言平反，指大家係咪忘記該條橋有行人路呀。張美雄強調自己說話嘅意思，係希望橋面能增設緊急求助器、急救箱、心臟起搏器等，同埋依家成條海濱都唔夠洗手間，當然有其他補給設施，佢係無任歡迎咁話。

有關網址：https://orientaldaily.on.cc/content/%E8%A6%81%E8%81%9E%E6%B8%AF%E8%81%9E/odn-20221211-1211_00176_404/%E6%94%BF%E6%83%85%EF%BC%9A%E5%BC%B5%E7%BE%8E%E9%9B%84%E7%A2%BA%E8%A8%BA--%E7%84%A1%E7%B7%A3%E8%B7%A8%E7%81%A3%E5%A4%A7%E6%A9%8B%E9%96%8B%E5%B9%95